Entrega di yabi di Cas Tan Tin

Speech di Presindente Fundacion Mi Cutisa

Su excelencia, Minister di Cultura Sra. Xiomara Ruiz-Maduro, su excelencia, Minister di Ensejansa, Sr. Rudy Lampe, Sra. Faustina Tromp y famia, directiva di Monumentenfonds y directora Sra. Anne Witsenburg, directiva y boluntarionan di Fundacion Mi Cutisa (FMC), miembronan di prensa y tur invitado presente.

Awe ta un dia historico pa Fundacion Mi Cutisa (FMC) y nos ta convenci cu tur cos ta pasa na

su debido tempo y na e momento oportuno. Y e momento ey ta awe, na momento cu tur e

instancianan envolvi y tur hende hunto tin e mesun meta: esta conserva un Cas di Cunucu manera e doñonan tabata biba aden y expande e cas aki cu atraccionnan cultural, social, educativo y turistico. E forma di traha di FMC semper tabata pa stimula desaroyo cultural y conscientisacion di nos mes hendenan y tur loke nos haci ta na prome luga pa e pueblo di Aruba. Haciendo esaki nos ta invita tur hende cu bishita Aruba pa pasa cerca nos y cera conoci cu nos cultura, nos tradicion y nos historia.

Kico ta e metanan di FMC pa cu e Cas di Tan Tin?

1. Na prome luga nos tin e meta historico-cultural, cu ta ankra den e statutonan di FMC.

Un di nos prome intencion ta pa laga e cas di Tan Tin mas tanto posibel manera cu e ta, pa mustra con nos hendenan tabata biba antes den un Cas di Cunucu. Nos kier laga nos yiunan mira e mangashina manera cu e tabata wordu usa antes, esta como deposito pa e hermentnan di traha den cunucu. FMC kier pone atencion tambe na tur e matanan cu tin tanto paden como pafo di cura ya cu mata ta forma parti di e bibienda di nos hendenan di antes.

2. Na di dos luga FMC tin e meta educativo-cultural. E parti di duna informacion historico di nos herencia cultural ta un aspecto importante den e trabou di FMC. Esaki ta nifica cu ora un hende bin bishita Cas di Tan Tin, lo bay tin guia pa duna informacion na nos bishitantenan riba diferente topico manera nos custumber- y nos creencianan. E grupo di enfoke cu mas FMC kier alcansa ta e scolnan na Aruba. E producto cu mas ta tipifica FMC ta nos trahenan tradicional y e informacion di nos trahenan lo bay forma un parti esensial di e producto educativo cu nos lo bay ofrece na Cas di Tan Tin.

3. Un otro meta di FMC ta e tarea di proteha, documenta y investiga tur loke tin di haber cu

nos tradicionnan di antes, esta e forma di biba di nos hendenan tanto prome cu e periodo industrial na Aruba, como despues di e periodo aki. Nos lo bay proteha y documenta e parti di naturalesa rond di e Cas di Tan Tin tambe y eventualmente planta mas mata tipico di Aruba. Entre otro e palo di Watapana cu tin dilanti di e cas aki, ta un di nos regalonan natural masha balioso agrega na e entrada di Cas di Tan Tin.

4. Un di e metanan hopi importante pa FMC ta e contribucion na e sector turistico-cultural na Aruba. Nos tur sa cu pa hopi aña caba, for di varios encuesta cu a haci bou di turistanan cu ta bishita Aruba, cu un di e peticionnan mas haci di e turistanan ta: cu nan ta desea di mira mas atraccion cultural na Aruba. Cu e Proyecto aki FMC lo bay crea un atraccion turistico pa saca potret den trahe tipico di Aruba den combinacion cu un souveniershop unda lo bay bende mas tanto producto produci na Aruba mes. Tambe lo duna e oportunidad di bebe y come algo tipico di Aruba y un di nos prome productonan ta nos frionan traha di fruta di Aruba y nos awa di lamunchi y awa di tamarijn.

Hunto cu SMFA nos lo bay traha riba e plan pa construi espacio adicional cu por fungi como deposito, sala di exposicion, espacio pa tene charla etc. Awor cu nos a haya un cas pa traha aden, nos lo tene nos portanan hancho habri pa sigui traha cu tur otro organisacion y instancia cu ta desea esaki. Un di nos prome partnernan lo ta SMFA mes y asina nos ta ofrece nos partnership y servicio na henter pueblo di Aruba. Nos prome actividad lo ta un Open Dag dia 1 di mei 2019, specialmente pa tur nos boluntarionan cu a yuda FMC durante e 14 añanan cu a pasa. Esey ta nos forma di yama danki di curason na un y tur cu a yega di haci trabou boluntario pa FMC y cu a kere den FMC. Un gradecimento grandi ta bay na nos Minister di Cultura, kende a mira e importancia di e proyecto aki. Un danki special na SMFA cu a haci tur esfuerso pa yuda rescata e cas aki y su contenido. Nos ta invita tur hende pa sigui e desaroyo di e proyecto aki riba e pagina di facebook di FMC y pronto nos lo lansa tambe nos web-site cu lo bay duna varios informacion. Awor cu nos tin nos mesun cas, FMC ta invita tur hende na Aruba, nos turistanan y muy en particular tur mucha y hobennan na Aruba, pa pasa bishita nos un rato y disfruta di tur loke nos tin pa ofrece.

Presidente di FMC

Sra. Nerisa Quant-Giel