Na Prins Bernhard School sra Cherry Ras a duna informacion y presentacion di algun trahe tradicional di Aruba. E alumnonan a haya e oportunidad di siña kico ta un cutisa, pargati, cashaca, trahe di saya cu djeki, lantera y sicuri of sincuria. E reaccion di e alumnonan tabata positivo y nan a haci varios pregunta tocante e trahenan di folklore di Aruba. E muchanan tabata asina contento cu nan tabata masha entusiasma pa bisti e trahenan di FMC cu Sra. Ras a hiba nan e scol.
E tipo di presentacion aki FMC ta tin varios aña ta coopera cu diferente scol a base boluntario. Intencion di e presentacionnan aki ta pa laga nos generacion di futuro cera conoci cu nos historia, nos tradicionnan di antes y pa nan mira con nos ante pasadonan tabata bisti.
Un di e preguntanan mas cu e muchanan tabata haci tabata: Kico ta un cutisa?
Cutisa ta algo pa bisti na pia cu cierto parecido na pargati of sandalia. Na cuminsamento di siglo 20 na Aruba, Boneiro y Corsou mayoria hende tabata bisti cutisa te ora cu nan por a cumpra un sapato. Cutisa su sole, e parti abou di e pia, ta traha di cuero of di tire di auto.
Cu cuero of cabuya ta traha repi cu ta pasa parti ariba di e pia. Tin diferente forma di traha e parti ariba. Por laga e repinan pasa meimei di e dede grandi bai mara rond di e coroshi di pia. Hende muhe mas tanto tabata bisti e modelo aki. E otro modelo cu tin dos repi di cuero ta crusa otro, mas tanto hende homber tabata bisti. Patras di e hilchi di pia tin un otro repi di cuero. E cunukero y piscado tabata traha nan mes cutisa. Tabata bisti cutisa na tur momento entre otro pa cana distancia largo, pa traha den cunucu y pa bai pisca.
Comentarios