Concierto
ABC
Un proyecto unico entre e islanan Aruba, Boneiro y Corsou
Concierto abc
Den cuadro di celebracion di 10 aña di existencia di Fundacion Mi Cutisa (FMC) na aña 2015, directiva di FMC a dicidi di organisa algo grandi pa e ocasion aki. E meta tabata pa realisa un idea y deseo cu directiva di FMC tabata tin basta tempo den mente. Esta organisa un concierto cu tres (3) cantante cu ta conoci na tur e tres islanan cu tin como idioma nacional Papiamento. FMC a logra haya cooperacion di Jossy Brokke di Aruba, Wesley Sint Jago di Boneiro y Ced Ride di Corsou pa realisa nan meta.
.
Na augustus 2014 dos representante di FMC Michael Eckmeyer (Tesorero) y Ruby Eckmeyer (consehero), a tene prome encuentro hunto cu Ced Ride na Corsou. Despues di e reunion aki FMC a tuma contacto cu Boneiro y dia 6 di november di 2014 a tene e di dos reunion na cas di Ced Ride. Aki FMC a reuni cu Fundacion Ced pa Semper y Fundacion Sabor Krioyo. Na e reunion aki tabata presente Jossy Brokke, Ced Ride, Wesley Sint Jago y Vice-Presidente di FMC Ghyslaine Krosendijk, kendenan a firma un protocol di colaboracion pa organisa ‘Intercambio Cultural di Musica di Folklore ABC’ na Aruba, Boneiro y Corsou den 2015.
Despues cu Fundacion Mi Cutisa a organisa Concierto ABC na Aruba dia 14 y 15 di maart 2015, Fundacion Sabor Crioyo a organisa Concierto ABC na Boneiro dia 4 y 5 di juli 2015 y finalmente Fundacion Ced pa Semper a organisa Concierto ABC na Corsou dia 14 y 15 di november 2015.
Tabata sigur un orguyo pa tur tres fundacion realisa Concierto ABC riba cada un di e islanan. Pa por a realisa e soño aki sigur sigur tabata un reto grandi pa tur tres fundacion. E perseverancia y convivencia di cada fundacion y nan boluntarionan tabata asina grandi, cu apesar di tur contra tiempo cu cada fundacion a haya nan confronta cu ne, finalmente tur fundacion a logra laga e musico- y cantantenan, representando nan isla, biaha pa bay participa na e intercambio riba tur tres e islanan.
Cada fundacion a organisa e concierto na nan propio estilo, segun nan propio forsa, tanto financieramente como a base di e boluntad di un cantidad grandi di boluntario, cu a yuda y sostene e fundacionnan pa por a organisa un intercambio di e grandura aki.
Aruba
Aruba
E prome concierto a tuma luga na Aruba riba e dianan 14 y 15 di maart 2015 na Cas di Cultura Aruba. E tabata un concierto di musica di folklore cu tur tres isla tin en comun, esta cu e ritmonan di wals, tumba, mazurka etc. Y cada artista por a presenta tambe nan mesun composicion- of canticanan cu nan a destaca cu ne tanto na nan mes isla como na e otro islanan. Fundacion Mi Cutisa a produci un dvd di e Concierto ABC cu a tuma luga na Aruba.
E toke special di e concierto aki tabata cu e musica di folklore di cada isla a keda presenta cada uno cu nan mes grupo di musico. E artistanan a agrega instrumentonan adicional na loke normalmente un grupo di folklore ta usa, nan a uza areglo nobo y composicion nobo. Ced Ride a presenta cu su banda tipico Folklore, Wesley St. Jago cu su banda Sabor Crioyo y Johnny Scharbaay hunto cu algun otro musico di Aruba a compaña Jossy Brokke. Cada fundacion mester a haci fundraising pa asina nan por a participa cu un delegacion na e dos otro islanan.
Boneiro
E Concierto di Musica di Folklore ABC a tuma luga dia 4 y 5 di juli 2015 na Jong Bonaire Jeugdhuis na Kralendijk, Boneiro. Aki e artistanan di cada isla a duna nan presentacion, esta Jossy Brokke di Aruba, Wesley St. Jago di Boneiro y Ced Ride di Corsou. Tabata un anochi musical cultural di gran taya unda a sobresali e talento di cada cantante y di e musiconan hoben cu a participa. E hermandad entre e 3 islanan a keda manifesta un biaha mas.
Participacion di Aruba na Boneiro no por a keda realisa sin e sosten di Fundacion Sabor Krioyo, cu a tuma na su encargo pa paga e estadia di e delegacion completo di Aruba na Boneiro.
Corsou
Fundacion Ced pa Semper (FCpS) a scohe pa organisa e intercambio cultural entre e islanan durante 4 dia, 12 te cu 15 di november 2015. Nan a scohe pa combina e concierto ABC hunto cu presentacion literario y cu participacion di mas grupo musical, banda di e tres gruponan cu originalmente a representa cada isla na Aruba y Boneiro. Pa motibo di scarsedad di fondo, e delegacion di Aruba no por a participa tur 4 dia na e programa cu FCpS a prepara. E delegacion di Aruba a bai diasabra 14 di november y regresa Aruba dialuna mainta 16 di november 2015. Mirando e esfuerso grandi cu tur tres cantante a haci pa prepara nan presentacion riba cada isla y e cooperacion cu nan a duna pa medio di traha a base semi-boluntario pa duna dos presentacion riba cada isla, Fundacion Mi Cutisa a haya na su luga pa entrega cada cantante un plakkaat como forma di aprecio pa nan participacion na Concierto ABC na Aruba, Boneiro y Corsou (mira Texto riba e plakkaat) hunto cu un DVD cu e grabacion di Concierto ABC na Aruba.
Un biaha mas e delegacion di Aruba tabata bon presenta. E coristanan femenino di Aruba a bisti nan trahe di ‘Saya cu Djeki’. Tur e musiconan y corista masculino di Aruba tabata bisti cu carson preto, camisa blanco manga largo y un ‘dash’i pushi’. E dos coristanan masculino a bisti tambe guiel riba e camisa y un sombre blanco riba cabes. Tur e trahe- y acesorionan tabata cortesia di FMC su coleccion di trahe tipico.
