Un soño di fundadora di FMC, Sra. Imelda Eckmeyer-Bermudez, ta bira realidad

Deseo di fundadora di nos organisacion, sra. Imelda Eckmeyer-Bermudez (d.f.m.), kende tabata un persona hopi conoci den bario di Noord, prome cu el a bay laga nos, tabata cu un dia su organisacion FMC por haya un luga unda por haci actividadnan cultural-educativo-turistico na Aruba.

 

Imelda Eckmeyer tabata un costurera masha conoci na Aruba. E mes a cose varios trahe tradicional di Aruba pa FMC. Su soño tabata pa un dia FMC por haya un cas tradicional di Aruba, unda nan por bay saca potret di bishitantenan bisiti den trahe tipico di Aruba. Ta hopi aña largo sra. Imelda, su famia y conocinan tabata core rond di Aruba pa mira unda tin un ‘Cas di Cunucu’ na Aruba cu FMC lo por sea huur of cumpra. Porfin e soño aki ta bira realidad dia 16 di april 2019, ora cu Stichting Monumenten Fonds Aruba (SMFA) entrega e yabi di Cas di Tan Tin na Minister di Cultura sra. Xiomara Maduro, kende na su turno lo entrega e yabi na FMC.

 

Fundacion “Mi Cutisa” ta un organisacion cu ta consisti di personanan conciente di nos mes cultura. Personanan cu kier duna un aporte positivo na desaroyo di cultura, na engrandece conocemento di nos herencia cultural bou di  muchanan y pueblo di Aruba en general y na promove loke ta forma parti di nos tradicion y foklore di Aruba.

 

FMC actualmente ta trahando riba varios investigacion y documentacion. Entre otro tin un grupo di trabou cu ta trahando riba descripcion di e trahenan tipico di Aruba. Tambe FMC kier investiga kico tabata nos productonan tradicional di antes cu nos hendenan tabata produci na Aruba? Di e forma aki por mira ki sorto di producto FMC por bay ofrece turistanan cu ta bishita Cas di Tan Tin, pa di e forma aki nan por hiba nan pais back un tiki di e cultura tradicional di Aruba.