Fundadora di Fundacion Mi Cutisa (FMC),

miho conoci como “E Sra. di Carnaval” of “Pepe”

 

Sra. Imelda Eckmeyer- Bermudez a nace na Aruba  dia 12 di augustus 1931. Na un edad hopi jong e mes a siña su mes cose door di mira un juffrouw duna les na otro hende.  Cosemento a bira su hobby y despues su profesion. Sra Imelda tabata gusta yuda y cose por nada pa esnan menos afortuna. E tabata cose pañanan di casamento y di ricibimento, mortaha, trahenan di sinterklaas y trahenan  di carnaval. Particularmente el a cose hopi disfras 30 aña consecutivo, sin nunca cobra pa cose paña di carnaval pa mucha. Hunto cu Lily Luydens, Sra.Imelda ta un di e fundadoranan di e Carnaval di Noord. Despues cu el a retira for di carnaval na 1997, el a dedica hopi di su tempo na actividad di ‘antes’ y na 2005 el a lanta Fundacion Mi Cutisa hunto cu su yiu Mavis Krozendijk-Eckmeyer y demas famia.

​

Den e prome 5 añanan di FMC, Mama Imelda a traha hunto cu su directiva y voluntarionan cu hopi entusiasmo, amor y dedicacion. El a cose varios trahe tipico y a conta nos hopi storia di e trahenan tradicional y di e custumbernan di nos grandinan na Aruba. El a percura pa siña tanto su yiunan, como tur mucha cu tabata rond dje pa nan aprecia nos tradicion y folklore. E tabata busca tur informacion di “Aruba di Antaño” pa e comparti cu nos.

E deseo di mas grandi di Sra Imelda Eckmeyer-Bermudez tabata pa: un dia Fundacion Mi Cutisa haya un cas tradicional di Aruba, cu su hadrei di Nort y hadrei di Seit. Pa asina den futuro FMC por expone tur artefacto di antes manera tabata usa nan y duna charla di nos trahenan tipico. Pa FMC por sigui promove nos historia, tradicion y folklor cu ta di tanto importancia pa nos hendenan local y stranhero sa di nan existencia y di e balor di nan pa un pueblo cu ta digno di su mes.